Барканории раисони шаҳру навоҳӣ. Мавсими дилЗАНАКу гаронии доруворӣ

Набиюллоҳи Суннатӣ

Оқибати моддаи 69-и Сарқонун

Инак охири моҳи март мавсими дилзанаки ашхоси соҳибкурсӣ ба вижа руасои шаҳру навоҳӣ фаро расид. Ҳар шаб чашм ба телевизор медӯзанд, то бубинанд,

чӣ касе бо вазифа хайрбод гуфту чӣ касе маснаднишин шуд. Мабодо-ку….худи ишон аз вазифа барканор….ҳазор бор худо мегӯянд, ки фармони президент тибқи моддаи 69…

Пизишкони дилшинос бар он назаранд, ки аксари мубталоёни маризи дил соҳибманасабон буда, шабу рӯзи аз мансаб рафтан ва ё ки ба ягон курсӣ соҳиб шудан қайди чунин беморон меафзудааст. Ҳамчунин дар натиҷаи як пурсиши оддии кӯчагӣ маълум гардид, ки ҳар панҷ сол авохири моҳи март ва авоили моҳи апрел нархи дорувориҳои амсоли феназепан, диазепен, карвалол, дибазол, валидол, валерианка ва глитсин ба осмон дакка мехӯрад. Сабаб ҳамон аст, ки аксари харидорони ин намуди доруворӣ ашхоси соҳибмансабанд. Шояд шумо хонандаи азиз носкашҳоро дида бошед, ки чӣ гуна кафи носро ба даҳон мепартоянд. Завқшиносон таъйид мекунанд, ки айнан ба даҳон партофтани қабзаи доруҳои оромкунанда аз ҷониби ашхоси аз вазифа барканор шуда ин шабу рӯзҳо бештар ба чашм мерасад.

Бар замми ин бисёр соҳибназарон на фақат худи руасои шаҳру навоҳӣ ва ё вузарову кубароро дар ин рӯзу шабҳо ба каф-каф ба даҳон партофтани валерианка таъйид мекунанд, балки раисони ҷамоату колхозу дигар майда-чуйда вазифаҳои ноҳияву деҳотиро низ дар ин мавсим ба каррот дидаанд, ки яке аз харидорони ҳар рӯзаи ин гуна дорувории оромкунандаанд. Суоли матраҳ ин аст, ки холӣ ва ё ба вазифа пешниҳод шудани ин гуна афрод аз ҷониби президент тибқи моддаи 69-и Сарқонун сурат намегирад, пас чаро онҳо ба қавле «безобита»-анд? Посух ҳам рӯшан ва саҳл аст: Ин гуна соҳибкурсичаҳову соҳибмақомчаҳо пуштупаноҳашон ҳамон руасои шаҳру навоҳияшон аст, ки инак бо «паридан»-и муттакояшон эҳтимол аст, худи ишон низ аз мансабашон канор раванд. Зеро ҳар як сардор бо командаи худаш кор кардан мехоҳад.

Инак, «паридан» -у ба мақоми раисӣ расидан сар шуд. Раисҷумҳур бо судури як фармон раисони як қатор шаҳру навоҳии вилояти Суғдро аз вазифа барканор кард. Ҳамчунин бо қарори ҳукумати кишвар дар бархе аз вазоратхонаҳо низ тағйироти кадрӣ сурат гирифтааст. Бо фармони раисиҷумҳур, Муҳиба Ёқубова аз вазифаи раиси шаҳри Исфараи вилояти Суғд озод карда шуд ва Субҳониддин Ашӯров иҷрокунандаи вазифаи раиси ин шаҳр таъин гардид. Ҳамчунин раиси шаҳри Конибодом Ҳилолиддин Шамсиддинов, ки дар нашрияи «Нигоҳ» «қаҳрамон»-и матбуот шуда буду снайпериаш (бе хато тир заданаш ба сӯйи говҳои мардум) ба таври силсила интишор шуда буд, аз вазифааш маҳрум гардид. Раиси ноҳияи Спитамен Аҳмадҷон Қобилов барканор ва Нумон Обидов ва Зулфия Узоқова ҷойгузини онҳо шуданд.

Инак вақт нишон медиҳад, ки барканоршудагон соҳиби курсиҳои дигари равғанин мешаванд ва ё…насиб! Ё қоидаи арифметикии «аз иваз кардани ҷойи ҷамъшаванда ҳосил ҷамъ тағйир намеёбад» рӯйи кор меояд?